من حكايات المهرجان الأسود....
فرقعة قوية دماء أشلاء أحشاء مثناترة مسامير قطع زجاج قطع سيارات متطايرة صراخ ركض في جميع الاتجاهات...دهشة واستغراب في الأعين استنكار في الحلوق مبحوح لا يتمكن من ترك الحناجر...مهرجان اسود دموي خلفه انفجار شاب قرب القنصلية الأمريكية بالمدينة..لكن الأمر لم ينته عند هذا الحد فالشرطة تلاحق شابا آخر يبدو انه يبحث عن شيء ما للاحتماء به أو انه يبحث عن مكان يعج بالناس كي لا يموت وحيدا...طوقته الشرطة من كل مكان... افلت منها و قصد مجموعة من المتفرجين الذين يبدو أنهم غير واعين بما يحصل وكأنهم يتفرجون على لقطة مطاردة سينمائية شيقة أو أن احدهم رمى عليهم غبار السكينة..فلا حراك ولا حتى ردة فعل وكان ذلك أخاف الشاب الذي جرى إلى ملتقى الطرق ووقف ويده على صدره وكأنه يريد أن يجر خيط المفرقعات المربوط إليه...ارتفعت مكبرات صوت الشرطة في الناس للهروب وضج المكان فجأة بصراخ النساء وكان الكل تأكد من أن اللقطة حقيقية وليست إحدى لقطات هوليود...إلا أنها في الحقيقة لا تخلو من ذلك الطابع السينمائي...ابتعد الناس دفعة واحدة وشمل الصمت المكان والترقب وصل ذروته عند الجميع...وصار الفتى يدور حول نفسه وكأنه عقرب ساعة تائه...لا يعرف ما يفعله وساد الصمت برهة وكان المكان لقطة بالعرض البطيء..انسل واحد من أفراد الشرطة من الجمع وسار بخطى وئيدة نحو منتصف الشارع حيث يقف الفتى واذا به يصرخ..
-سير اصكع غادي تموت
-وتانتا غادي تموت
-حرام تموت بوحدك
-او ماحرامش انتا تقتل راسك وتمشي كافر.
-لا أنا غادي شهيد.
-منين شهيد وعلاش استشهدتي.
-احنا نصارى وانتا وبغيتينا نامنو بالله او ما بغيناش.
-لا الفساد ذاع في البلاد.
-الفساد كتخدم باش تغيرو ماشي ادير فيلم سينمائي.
-هذا ماشي فيلم هذا حقيقة وسير بحالك ماباغي نقتل حد.
-ملي ماباغي تقتل حد لاش حاط صمطة الموت.
-هما اللي قالولي استشهد باش اهلك يرتاحو.
-شكوناهوما وكيفاش اهلك غايرتاحو.
-سير لهيه راه والله ما باغي نقتل حد معايا.
غير قول عرفتي انتا دابا سيد الموقف إلى متي غاتقتلني معاك وانا ماعندي لا سلاح ولا هم يحزنون..وتانا زاعف وما عندي فلوس إلى مت ممكن يصرفو على قراية ولدي حاتم هو قدك على فكرة
-أسمو حاتم... ههههه وانا اسمي سليم.
-قوليا شكون هادو اللي قالوليك اهلك غايرتاحو
-ماكانعرفهمش يلاه تلاقيت معاهم هادي جوج سيمانات.
-جوج سيمانات خلاوك تقتل راسك.
عادي بحال كلشي اللي ما كالوش الحوت فوق طانجة يقتلوه السباليون ولا يستشهد..والاستشهاد احسن..
-الله اكبر على هاد البلاد عامرة غير بهاد العينات.
-عندك شي عينة اخرى ..ايه كاينة وحدة هاديك خارج السلم ناس مصنوعين كيشد الباك في دارهم كايمشي برا يقرا عاماين وكايجي مدير على اللي كبر من اباه..هادو هما اللي كتقصد...
-ههههه هادشي كاين ولكن كاينة العينة ديال ولدي حاتم ...كيبات يحفظ في البالكون وكايضل يحفض في المكتبة وكايطلب الدراري ياخذ الدروس ديال السوايع لأني ما قادرش نخلص ليه عشرالاف ريال ليهم في الشهر..وباغي يولي أستاذ وجامعي ماشي أي أستاذ..
-كيفاش ماقادش تخلص ليه واللي بحالك كيضل يكريسي في عباد الله في الرونبوانات...
-صباعك مشابهين كلهم أسليم...
-لا... علاش.
-ماشي كلشي الناس بحال بحال..الله يهديك اولدي...عرفتي انتا دابا كتعذب في الوالدين دياولك..اوفراسك اوفينا...
-راه شفتك قربتي بزاف بعد مابغيتش نتفركع عليك...باش ما تتوسخش ليك كسوتك...
-أنا غانحيد هاد الكسوة إلى جراتلك انتا شي حاجة...
-زعما خايف عليا..
-قلتلك راك قد ولدي وانا مسؤول عليك والى ما قدرتش نعاونك لاش نسوى احسن ليا ندير طابلة ديال البيض قدام شي مارشي نصور فيها رزق ولادي وبلا هم...
-باش غاتعاوني كاع.
-أولا ماغاتموتش وترجع لوالديك.
-الله اكبر عليا أنا ياك اللي دار هادشي الإعدام...
-قتلتي شي حد..
-لا ووالله ما كنت غانجر الخيط حدا شي حد..
-مالك مسطي..غاتقتل راسك فابور...
-لا كنت باغي نقتل راسي حيث قالو ليا غايديو الوالدة لفرانسا تفتح على ركبتها وترجع صحيحة...
-الوالدة.. اشمن صحة غاترجع ليها إلى انتا مشيتي من ايديها ولا انتا كنتي حاسب راسك غاتموت عابلعاني وتحيا ثاني...
-معلش المهم هي تداوا..راه ماشتيهاش كتبات تغوت مسكينة بالألم وتاواحد ما عتقها ..قالو خصها عملية.. كنمشيو للسبيطار هي كتألم وهوما كيقولو لينا هاكاو رانديفو من بعد اربع أشهر واش هادا حق...
-وانتا إلى قتلتي راسك غادين السبيطارات يتصلحو على عقل عندك..
-مال عقلي أنا على الاقل بغيت ندير شي حاجة...
-إلى بغيتي دير شي حاجة هي إلى نعلتي الشيطان وساليتي لينا هاد المهرجان...
-وراه غايقتلوني..
-شكون هادو...
اللي سيفطوني...والى ما قتلونيش هوما غاتقتلوني انتوما...
-هما يقتلوك على السيبا في البلاد..واحنا إلى بغينا نقتلوك علاش نصدعو راسنا ونزيدو علينا فلوس قرطاسة هالموت فابور ومن عندك انتا اللي جايبو...
- اشنو زعما...
زعما نعل الشيطان وما دمتي ما قتلتي حد ما عندك علاقة بهادوك الناس وماعارف حتى الحقيقة علاش مسيفطينك يعني تقدر تخرج منها بحال الشعرة من العجينة..
- كيفاش....
- شهد عليهم والمحكمة تعتابرك شاهد..وأنا ما غانخلي حتى كلما قلتيها ليا غانشهد معاك بلي سمعت...وزيدون انتا مازال صغير يعني مدفوع وحوايج أخرى من الممكن للمحكمة تشوف فيك من اجلها...
-وشكون يظمن ليا....
- الضامن الله وأنا ماغانخليكش باللي عطاني الله غانساعدك وأمك غادي نوقف معاها لوجه الله . انتا كاتقرا.
-شديت الباك وباغي نولي استاد ديال الرياضة..
-فين في جاهنام هانتا كنتي غتولي المرحوم...
-والله كون بغاو يشريو مني كلوتي حتى نبيعها باش امي ما تتالمش ولكن هادو راهم زينو ليا كلشي حتى اللقاء معا الله...
-هههههههه مالهم مرفوع عليهم الحجاب الله يهديك أولدي...خلي عليك هاد اللعب ونعل الشيطان...
-اعوذبالله من الشيطان الرجيم...ولكن راه هكا ولا هكا غادينموت...
-كلنا غادي نموتو ولكن أنتا ملي تولي أستاذ وتكبر وتدير وليدات وتنهي المهمة ديالك في الحياة عاد موت بحال عباد الله...
- لا راه ...راه قالوليا مانقدرش نحيد هاد السمطة والى حاولت غاتفرقع يعني ميت ميت الله يرحم أباك بعد ما باغي نقتل معايا حد بعد...
-تهدن أسليم ..وان شاء الله غاتخرج منها سليم عندنا ناس يقدرو يحيدوهالك بلا ما تضرك...وقف في بلاصتك وما تتحركش وخليني نغوت ليهم ....
- غيضربوني....
-علاش أسليم هاد البلاد محتاجة رجالة بحالك ياخدو القرارات ولكن القرارات الصائبة ماشي المريضة أنتا راجل وغادي ماتموتش إن شاء الله وهادشي غايدوز بحال الضحك وغادي تتفكرني من بعد...
-غاتخليني معاهم بوحدي ....
-لا غادي نبقا معاك على قد المستطاع...ويلا خرجتي من هادي غادي نعتابرك بطل وانكون فخور أن ولدي يولي صديقك...قولي الوالد ديالك فاش خدام....
-الواليد كان طاشرون ومرض بالسكر ومات الله يرحمو...
-الله يرحمو...عندك كاع هاد المسؤولية و مشيتي ورا قلالين خوف الله ...غادي ندير اللي في جهدي باش نساعدك وانتا غادي تصبر...وغادي يفرج عليك الله ونتمنى انك تولي خو حاتم ولدي....
-ماعرفت اش نقوليك....
-هاك مسح عينيك من هادوك الدموع الرجال ما كايبكيوش...وخليني نغوت ليهم يجيو يفكوك من هاد الويل ...قول واخا اعمي...
-ههههههه واخا اعمي ...عمرني مانبقا نعاود ...
- الله يجعلني نتيق انك غادير عقلك .....
استدار الشرطي بحذر وبإشارة منه جاءت الفرقة الخاصة بتعطيل المفرقعات وخلال ربع ساعة من الترقب واحتباس الأنفاس خيم الصمت على المكان ككل وأخيرا نجح الفريق في عمله..ارتفعت الزغاريد والله اكبر في المكان وكأنه سيناريو محبوك لمخرج محنك في صوت واحد تعالى التكبير والتهليل والتصفيق والتصفير انهار سليم وانهار بجانبه الشرطي....تعانقا وبكى كل من جهته ..وفرغ ما في داخله .....ووسط هذه اللقطة المؤثرة شقت دراجة نارية الحشود يركبها ملثمان وسارت بأقصى سرعة نحو الرجلين وتوالت الطلقات النارية وماهي إلا ثواني لا تكاد تعد يسجى على الأرض أربعة أجساد ....تغير لون الدنيا في أعين الجميع فكيف بعد هذا الطواف المرطوني يضاف هذا المشهد البشع بركتان من الدماء ...ونيران تحرق الدراجة....كل من كانوا متأهبين لإطلاق النار على سليم في حالة ما إذا كان يضمر شرا افرغوا شحنات مسدساتهم في جسمي راكبي الدراجة...اللذين أصابا بدورهما الشرطي في كتفه وسليم أصيب بطلقتين في فخذه وذراعه..تحسس سليم يد الشرطي وقال له
-عمي واش أنتا بخير..
- وأنت..
- ياك قتليك راني ميت ميت...
-فين تضربتي...
-في رجلي وذراعي..
-ههههه نوض راه ربي كيبغيك...
-علاه ماغانموتش...
-اللي غايموت هو الحقد والغلط وراه ميت قدامك....
-باش تتأكد كاين شي مسلم يقتل الناس غير هاكاك...
-إيه علاش ضربوك حتى أنتا...
-حيث ماكيقلبو لاعلى إسلام ولا على والو كيقلبو غير على مصالحهم
فيق واصبر واعرف أن ما حك جلدك مثل ظفرك واللي فرط يكرط خدم تريح راسك وتريح الناس واللي قدر يبدل الغلط يبدلو واللي ماقدرش على الأقل ما يوقعش فيه.. ولا اله إلا الله ....
-لا اله إلا الله...
ومع آخر كلمة نطق بها سليم راح في غيبوبة....أسرع الفريق الطبي إليهما وحملتهما سيارة إسعاف وانطلقت في حراسة مشددة ....وبدا المكان أشبه بساحة تمثيل منه بموقعة حقيقية لأنه وببساطة مشهد بعيد كل البعد عن تقاليد شعب مسالم متضامن......
Chourouk
ليست هناك تعليقات:
إرسال تعليق