محاورات ..

محاورات..



( ركن غرفة شبه مظلمة..طاولة عليها قارورة من النوع الصغير الحجم بها ماء وتتدلى منها وردة لا مجال لتحديد لونها مع الضوءالخافت للغرفة...على الجدار تتدلى صورة لامراة في مقتبل العمر..في ركن من اركان الغرفة يقف شاب يحمل جريدة..)


الشاب..لم اعد افهم ما الذي تتحدث عنه هذه الجرائد..كل عدد منها يتحدث عن مشكل من مشارق الأرض ومغاربها ولم ار في حياتي موضوعا يتحدث عن البشر من نوعنا..
(يدخل آخر إلى الغرفة يحمل مجموعة كتب )
1..إلى أين
2- ساعود
3- وهذه الكتب..
2..أبيعها لم اعد احتاجها
1..كيف ذلك ونحن في منتصف الفصل الجامعي
2..انس الأمر فلم يعد يهمني ذلك..
1..ماذا..لم اعد أفهمك يا صاح..وأنت بالأمس القريب كنت من المتعصبين للدراسة..
2..كان ذلك بالأمس القريب أما اليوم فهو حديث آخر مغاير
1..ماذا تغير..الدنيا نفس الدنيا والعالم نفسه والكلية نفسها حتى الدروس نفسها فما الذي تغير...
2..لا شيئ في كل ذلك..انا من تغير..ولا تسالني كيف..
1..ومن اسال اذن..
2..لا اعلم اسال العولمة او اسال التقدمية اوالعروبية او السياسة..اواي تسمية من التسميات المعاصرة..التي غمرت عالمنا وإطاحة بأسوار أحلامنا الجميلة...
1..معك حق فالواحد منا لم يعد يعلم اي تياريتبعه..فما ان تستقيم احدى النظم حتى تظهر نظم اخرى..تزيح سابقاتها عن الطريق..لكن لا اظن ان ذلك يمكن ان يؤثر على مساردراستك..
2..انا لم اعد احتمل ما يحدث
1..وما الذي يحدث
2..لا شيء ألا تعلم أنت
1..لا اعلم..أنا حائر في شيء واحد فقط
2..ما هو
1..لا اعلم لماذا لا يتحدثون عنا في هذه الجرائد
2..دعني ارى
1..هاهولتتاكد بنفسك
2..شهدت المنطقة الغربية مشاحنات بين سيدتين حول موضوع كبير ومقلق من الاجمل بين الاثنتين..قضت المحكمة بغرامة مالية على رجل شتم احدى السيدات الائي يشتغلن ببيع الجمال وقد لاقا الحكم تاييدا منقطع النظير من لدن العديد من المنظمات الحقوقية في هذا المجال الحي..احتفلت احدى الجمعيات بحلول عامها الخمسين وهي جمعية متخصصة في صناعة انواع التبغ الموازي..السيد العامر اصبح بملايره العشرين اغنى رجل في المنطقة وقد جمع ثروته من صناعة الطعاريج وقد اضاف الى نشاطه استيراد مفرقعات عاشوراء مما جعل منه المستورد رقم واحد في هذه المادة الحيوية..
1..كفى الا تفهم الا ترى انك تقرا ترهات
2..دعني اكمل علني اقع على شيء مفيد انتظر.. تكتلت مجموعة أحزاب تحت لواء واحد وشكلت حزبا قويا تحت "اسم علاه دخول الحمام بحال خروجو"
1..أناري اخويا دابا عاد كنا كاندويو باللغة العربية الفصحى
2..ما بقا لاش.. فين غادي تبيع كتوبتك
1..مول الزريعة اللي فراس الدرب دار معايا خمسمية درهم جملة
2..عطيه تاكتوبتي واجي نديرو شي طابلة ديال الببوش حسن من هاد الحفى ديال العينين والعقل اللي كانديرو
1..الطيف مالك اخويا عالقرص قلبك طايب كنت نسحاب غيرانا بوحدي
2..عييت ما نصبر علاه هاد القراية اللي كانحفي بيها عيني غاديا ترجع فرصيدي عشرين مليار بحال هاد السي العامر
1..عرفتي هاداك السي لعامر راه عامر عابلبرد حيث ما قاريش وشي نهارغايجي شي برد يسوط ليه فدوك لفليسات وما غادي يبقى يسوى والو..
2..انوض هاديك الهضرة تكولها علينا حنا اللي مزاليط ولاصقين فلكتوبة ديال ناس ميتين فات وقتهم اوفرحانين تاحنا
1..راه عندك شوية ديال الحق ولكن
2..اش ولكن شتي شي موصيبة كثر من هادي الناس كالسة كاتبني وتعلي وتخبي فلفلوس واحنا مضاربين على كميلة ديال لعدس نهار نطيبو الروزولا سباكيتي كاع السيتي كتعرفها
1..حيث انتا كاتفضحنا وكتعرض على بنادم ..جوج عواشق ديال السباكيتي كاتشرك معانا فيهم قوم او اصاحبي تاتولي تاجر وفوح على بنادم كيما تبغي ..
2..الله يهديك صافي قلب علينا هاد السينتة غادي تبيع لكتوبة ولا لا
1..لا
2..علاش
1..الى انا كنت غانبيع كتوبتي فانا كنت كانسحاب راسي بوحدي اللي مظلوم وغاضب على الوضع انما ملي نوليو بجوج فانا فهمت بلي هاذي مشكلة ماشي ديالي بوحدي وفهاد الحالة امولاي الحل ماشي هو نبيعو لكتوبة ونساليو معا لقراية ونبيعو الببوش
2..واش من حل باقي باين ليك
1..الحل هواننا نخليوالعالم يسمعنا
2..كاتحلم
1..وانا كانقرا نحلم كيما بغيت
2..اوا بقا تحلم انا غادي
1..الله يهديك اجي اللهنا انا وانتا غادين نقراو ونحلمو
2..بوحدك اخويا الحلم عمرو ما غايجيبليا عشرين مليار
1..الببوش اللي غايجيبولك فيييو
2..فيييو ولا بيييو ما سوقيش دخلتي ليا هاد الفكرة لراسي وغادي نمشي نحفر الصخرونجمع لفلوس تانا باش شي نهارنلقى سميتي فهاد الجريدة
1..فصفحت الحوادث هذا الصباح قضى فلان بن فلان نحبه تحت احدى الصخور الكبيرة ما كاين موشكيلا ديوباباه لقبوربحالو موجودين بزاف
2..وعلاش اللي ما تقولش هذا اليوم دشن السي فلان بن فلان اكبر مقهى لبيع كلشي شيحاجة خواركثرمن لاس فيجاس
1..لاس فيجاس.. انوض من القلبة..
2..اوا اش ندير
1..قرا وحلم الى بغيتي
2..الى قريت واش بيديا نبدل العناوين ديال هاد الجريدة
1..الى قريتي وحلمتي وتشبتي بالحلم ديالك ممكن انك تعمل جريدة خاصة بيك تكتب فيها اللي بغيتي وتربح بيها لفلوس اللي بغيتي.
2..وندخل للبرلمان
1..وتدخل للبرلمان ..ولكن لاش
2..باش نرتاح حيث غانخدم بزاف باش نولي تاجروملي نولي تاجرنترشح وندخل للبرلمان باش ندير لاسياست....
1..هههههه ما بقاتش... ولاو كيحطو طيرموس ديال القهوة قدام الباب ما تدخل تاتشرب ليك جوج كيسان باش تفيق مزيان
2..ياك اوا مالها نشرب اخويا ونتفرج فالمرافعات والثمثيليات اللي كايديروها هادوك الناس
1..تاهادي قديمة ولا اغاراس اغاراس الناس فاقت..
2..اوا اخويا ملي الدنيا ولات زوينة والناس فاقت حنا مالنا ما مقاد لينا والو
1..البلاصة اللي انت فيها ناس كثيرة غاتموت وتدخل ليها وما قاداش
2..هالعار اخويا الى عندك الشاري انا بايع
1..الله يهديك
2..ايوا وهاد الجورنان اللي فيه كذوب
1..ماشي كذوب كاين ولكن ما كاينش غير هذاك الجورنان كاينين جرانن خراين..عرفتي جدا ديما كانت كاتقول ليا الكرش كتولدالصباغ والدباغى والدنيا فيها الزوين والخايب
2..اوا وانتا مالك كنتي حارن وكنتي باغي تبيع حوايجك وغاضب على الوضع تانقلتي ليا العدوى
1..اوا الله ينعل الشيطان ولد لحرام راه كيوسوس لبنادم وتاتا اخويا ماجالبش هههه اش ندير ليك..
2..مالك عاقول الحق
1..والوسميرة قالت ليا بان ولد جيرانهم جا من الطاليان وخطبها وغايتجوجو هاد الصيف
2..اوا انتا كنتي غاتبيع كتوبتك باش تمشي تجوجها هههههههههه
1..لا كنت غانبيعهم ونديرشي مشروع باش نقدرنخطبها باقي سبع شهر على الصيف
2..وهي اش قالت
1..عينيها خارجين عجبها الطالياني
2..واخا..هاد الطالياني فاش خدام ما قالتلكش
1..تاواحد ما عارف هاد القضية
2..هي مافيوزي
1..ههههههههه مافيوزي ولا الغبرة
2..الغبرة ولا لحجر اللي تبيعك على قبل الغبرة ولا المافيا وكمشة ديال لفلوس حلال ولا حرام ما تسواش دقة من دقات قلبك رد بالك لراسك وكمل قرايتك ما بقا لينا والو ونكملو وايديا فاديك ممكن نديرو لعجب وتتلاقا ليك معا شي سميرة ما تبدلكش بشي طالياني ولاسباليوني..
1..ما غاتخويش بيا اخويا ..
2..ما تخافش اخويا..
يتعانق الاثنان ويسدل الستار..